Kapalaran sa SWU mag-agad sa UV ug USC

CEBU, Philippines - Samtang ang University of the Visayas Green Lancers makigtige batok sa University of San Carlos Warriors pagtak-op sa 16th Cebu Schools Athletic Foundation, Inc. basketball semifinals karong adlawa, seguradong ang Southwestern University-Phinma Cobras magtan-aw sa kiliran  nga  sagol kakulba ang dughan samtang nagpaabot sa   resulta sa duwa.

Kini gumikan kay ang resulta sa duwa tali sa UV ug USC nga gikatakda karong alas-5:15 sa hapon diha sa Cebu Coliseum mao may modeterminar kun makasud ba o dili sa finals ang Cobras.

Ang Cobras inilog unta kaayo, apan nabutang sila karon sa takilid nga posisyon human makatilaw og 65-53 nga pilde sa Lancers nga maoy nakabugto sa 12 ka sagunson nilang daog.

Bitbit ang 2-0 nga baraha, ang Lancers segurado nang moabante sa finals. Matagak lamang sila kun mapilde sila og sobra sa 20 puntos sa Warriors nga bisan unsaon og basa imposible nga mahitabo.

Samtang ang Warriors gikinahanglan nga modaog batok sa UV bisan lamang og kuwatro puntos aron sila maoy makaangkon og katungod nga harungon ang Lancers sa kampiyonato ug sa susamang higayon palagputon ang Cobras.

Apan gikinahanglan una nga pildihon sab sa Cobras ang University of San Jose-Recoletos Jaguars sa ilang duwa sa alas-6:45 sa hapon aron kahatagan og gibug-aton kining tanan nga mga posibilidad.

Kun lantawon ang tanan nga anggulo, wa’y duda nga kapalaran sa Cobras mag-agad kun unsay dangatan sa duwa sa UV ug USC.

Ang Cobras igo lamang makapanghinaut dala ang pag-ampo nga pildihon sa Lancers ang Warriors ug dayon mopatigbabaw sila sa Jaguars kay mao kini ang bugtong yawi aron malugwayan pa  ang ilang kinabuhi karong season. (BANAT NEWS)