SWU lady spikers subha’g daog

CEBU, Philippines - Gisubhan og daog ang defending women’s champion Southwestern University human sa ilang kulbahinam nga five-setter nga kadaugan batok sa University of San Jose Recoletos sa pagsugod sa volleyball event sa Cebu Schools Athletic Foundation, Inc. kagahapon didto sa University of  San Carlos gym.

Ang Lady Cobras milatos sa USJ-R, 21-25, 22-25, 25-19, 25-21, 15-10.

Maayo ang sugod sa Lady Jaguars sa wala pa sila maluya nga maoy mihatag og kahigayonan sa SWU aron ipugos ang duwa sa deciding set. Gikan didto misutoy ang SWU, 8-5,  apan miaksiyon pa og gukod ang Lady Jaguars aron pahakan ang labaw ngadto na lang sa uno punto, 10-11.

Human sa time-out sa SWU, daling miresponde sila si Therese Ramas, Floremel Rodriguez ug Renee Coleen, Nathalie Gimeno ug wala na nila tugti pa nga makagukod ang USJ-R.

Sa sayo pa, ang host USC nakaipsot usab sa ilang five-setter nga kadaugan batok sa University of Southern Philippines Foundation, 25-23, 23-25, 25-16, 23-25, 16-14. (BANAT PALARO)