Star dili gihapon mosurender

CEBU, Philippines - Wa’y milagro nga makasalbar sa kampanya sa Star Hotshots nga makasud pa sa playoffs sa PBA Governors’ Cup,  apan ang koponan maningkamot gihapon sa nahabilin nilang mga duwa aron malikayan nga mahiaguman ang labing ngil-ad nga rekord sa kasaysayan sa ilang prangkisa.

Kuli na kaayong masud sa playoffs ang Star tungod kay padayon silang nagbitay sa standing sa ilang 1-7 win-loss record. Kini ang unang higayon sud sa lima ka tuig nga dili makaduwa sa playoffs sa Star.

Hinuon, paningkamotan nila nga maputol ang ikalima nilang sunod-sunod nga pilde karong adlawa  sa dihang ilang harungon  karon ang Meralco Bolts sa alas-6:45 sa hapon, human sa duwa tali sa  Rain or Shine Elasto Painters ug NLEX Road Warriors nga sugdan sa alas-4:30 sa hapon didto sa Mall of Asia Arena.

Usa sa mga haligi sa Star nga si Marc Pingris miangkon nga lisud  alang kanila nga dawaton nga anaa sila karon sa ilawom nga bahin sa standing ug grabe iyang kauwaw ilabi na ngadto sa mga fans sa koponan.

Si Pingris miingon nga padayon gihapon sila nga maningkamot hangtod sa katapusan sa elimination round.

Gawas ni Pingris nga mohatag sa ilang tanan  nga mahimo aron  modaog ang  Star mao ang import nilang si Joel Dwyane Wright, Mark Barroca, Peter Jun Simon ug James Yap. (BANAT PALARO)