Worthy/UV kampiyon sa 8th Partner’s cup
CEBU, Philippines - Ang Worthy/University of the Visayas Green Lancers milampos pagposte og 2-game sweep sa Mighty Sports/University of San Jose-Recoletos Jaguars, 72-68 aron paglangkat sa kampiyonato sa 8th Cebu Schools Athletic Foundation, Inc. (CESAFI) Partner’s Cup kagabii didto sa Cebu Coliseum.
Si Michael Macion mihipos og 18 puntos uban ang siyam ka rebounds, samtang si Rey Suerte midugang og 14 puntos, tulo ka rebounds ug tulo sab ka assists sa Lancers nga madasigon kaayong mibangon human maalkansi og 12 puntos, 17-5 sa sayong bahin sa duwa.
Nagsugod og panginit ang Lancers sa ikaduhang kuwarter diin ilang giwani ang Jaguars, 20-11 aron pag-ilog sa labaw atol sa halftime, 39-38.
Igo lamang nakatabla ang Jaguars, 35-35, gumikan kay ang Lancers mipabuto og 11-2 run aron pagtala sa kinadak-an nilang labaw, 46-37 sa nahabilin nga usa ka minuto sa ikatulong kuwarter.
Hinuon ang Jaguars nakapakita pa og maayong labok sa katapusang hunat hinungdan nga sila nakatabla og usab, 68-68 apan dali nga miabante og balik ang Lancers, 71-68, pinaagi sa free throws nilang Bassieru Sackor ug Jerome Napao sa nahabiling 9.3 segundos sa duwa.
Duna pa unta’y tsansa ang Jaguars nga moduso sa duwa ngadto sa overtime, apan nakamugna kini og crucial turnover gumikan sa inbound pass ni Ricky Dyn Peromingan nga wala masawo ni Miguel Gastador.
Si Napao mitapos og 13 puntos, samtang si Sackor mitampo og 12 puntos, 13 ka rebounds ug tulo ka steals sa Lancers.
Bugtong naghatag og kahayag sa Jaguars si Peromingan uban sa iyang 21 puntos. (BANAT PALARO)
- Latest
