Mighty Sports/USJ-R buhi pa

CEBU, Philippines - Ang Mighty Sports/University of San Jose-Recoletos Jaguars nakaangkon pa og laing kinabuhi human giparot ang Highlands Corned Beef/University of Cebu Webmasters, 82-77, sa semifinals sa 8th Cebu Schools Athletic Foundation, Inc. (CESAFI) Partner's Cup kagabii diha sa Cebu Coliseum.

Si RJ Dinolan maoy nangu sa upat ka USJ-R players nga mitali og double figures uban sa iyang 21 puntos, apan si Albert Catilok nga mihipos lamang og otso puntos maoy nahimo nilang bayani human mipasud sa krusyal niyang layup sa daginutong oras nga nahibilin.

Sa dihang nakasikit ang Webmasters ngadto na lang sa tres puntos, 80-77, human sa 3-pointer ni Justine Dacalos, si Catilok milansang sa iyang itsada nga maoy nakatuldok sa kadaogan sa Jaguars sa nahibilin nga 15 segundos sa duwa.

Mas dako pa unta ang labaw sa Jaguars human unang mipaduol ang Jaguars, 74-76, apan sila si Dinolan ug Jaybee Mantilla mipasud lamang og upat sa walo ka free throws aron paghatag og higayon sa Webmasters nga makagukod.

Mi-abag ni Dinolan sa opensa mao sila si Ricky Peromingan ug Edmund Bayhonan nga nagkumboya og 30 puntos alang sa Jaguars, nga gikinahanglan nga modaog sa katapusan nilang duwa batok sa Worthy/University of the Visayas Green Lancers aron maka-angkon og luna sa finals. — EBV (BANAT NEWS)