Nietes mipasurender ni Garcia sa 5th Rd

BACOLOD CITY, Philippines – Segun sa iyang gisaad, si Donnie ‘Ahas’ Nietes mikulit og impresibong kadaugan atubangan sa iyang mga katagilungsod.

Ginamit ang nagkahait niyang abilidad, si Nietes (38-1-4, 22KOs)   mitumba sa Mehikano niyang challenger nga si Raul ‘Rayito’ Garcia(36-4-1, 22KOs) duha ka higayon sa ikatulong hugna dayon na ngadto sa pagdepensa sa iyang WBO light flyweight title pinaagi sa ‘technical knockout’ sa wala pa magsugod ang ikaunom nga hugna sa main event sa “Pinoy Pride 36: A Legend in the Making” niadtong Sabado sa gabii dinhi sa University of St. La Salle Coliseum. 

“Plano ko talaga na i-knockout siya kasi gusto ko talaga makakuha nang impressive win,” matud pa ni Nietes nga nagpabilin isip longest reigning Filipino world boxing champion.

Dominante si Nietes gikan sa pagsugod ug gipaluhod niini si Garcia duha ka higayon sa third round ginamit ang susamang kombinasyom sa left hook nga gisundan og body shot.   

Padayong gikulata ni Nietes si Garcia sa sunod nga duha ka hugna nga maoy nagtuldok sa gabii sa Mehikanong bisita.

Gibati nga dili na siya makasugakod pa sa way puas nga pagkulata kaniya ni Nietes, si Garcia misurender kay nagdumili na pag-away sa wala pa sugdi ang ikaunom nga hugna.

“Ini-expect ko talaga na tumbahin siya kasi pinag-aralan namin kung paano siya papasukin. Sa first round pa lamang alam ko na ma-knockout ko siya,” dugang pa ni Nietes nga midaog sa WBO title human gipilde ang kaluha ni Raul nga si Ramon Garcia sa susamang binyu lima ka tuig ang milabay.

Sa iyang kadaugan, giselyado ni Nietes ang engrande niyang away batok ni Moises Fuentes nga maoy mobida unya sa ikaduhang Pinoy Pride event sa Amerika karong Septiyembre 24 sa StubHub Center sa Carson City, California. 

“Nietes is like wine. He’s better now than he was years ago. He’s on a different level now. It’s time for him to fight the big names out there,” matud pa ni ALA Promotions President and CEO Michael P. Aldeguer.

Sa main supporting bout, si  ‘King’ Arthur Villanueva (29-1, 15KOs) nakabangon human malukapa sa ikaduhang hugna aron pagpanalipod sa iyang WBO Asia-Pacific bantamweight title pinaagi sa 4th round knockout batok ni Juan ‘El Penita’  Jimenez (22-10, 15KOs). 

  Human nahagba sa ikaduhang hugna, si Villanueva na sab maoy mipakamang ni Jimenez ginamit ang solidong right straight sa third round.

Ang katapusan sa away nahitabo sa ikaupat nga hugna sa dihang kalit miluko si Jimenez human nagpakong ang ilang ulo ni Villanueva.

Kay nagtuo nga kumo maoy nakahagba ni Jimenez, giiphan ni reperi Dan Nietes ang Mehikano nga wala na makabarog pa sud sa pipila ka minuto.

Sa laing sangka, si Milan ‘El Metodico’ Melindo (34-2, 33KOs) midaog pinaagi sa technical unanimous decision batok ni Maximino ‘Max’ Flores (19-3, 13KOs).

Giundang ni reperi    Ver Abainza ang away sud sa 56 segundos sa ikapitong hugna kay dili na makatiwas pa si Melindo gumikan sa dakung gisi sa ibabaw nga bahin sa iyang mata   resulta sa aksidenteng headbutt.  Si   Melindo, nga overweight og lima ka libras sa wala pa ang away, maoy mipatigbabaw sa scorecards sa mga  hurado 69-64, 68-65, 67-66 hinungdan sa technical decision. (BANAT NEWS)