Gilas Pilipinas sugod sa pormal nilang ensayo

CEBU, Philippines - Gisugdan na sa Gilas Pilipinas ang pormal ug tinuoray nilang training camp pagpangandam sa Manila leg sa Olympic qualifying tournament nga sugdan sa Hulyo 5 didto sa Mall of Asia Arena.

Gilangkuban sa mga PBA stars, ang Gilas mihimo sa ilang ensayo kagahapon uban ni Gilas coach Tab Baldwin. Wala pa hinuon ang ilang sinaligang  naturalized center nga si Andray Blatche kay sa tapos buwan pa siya moabot dinhi sa Pilipinas.

Sangkaon sa Gilas  mao ang mga dekalibreng koponan sama sa France, Canada, Turkey, Senegal ug New Zealand alang sa usa ka luna sa basketball event sa Rio Olympics sa Agosto.

Lakip sa misalmot sa training mao sila si JuneMar Fajardo, Greg Slaughter, Marcio Lassiter, Japeth Aguilar, LA Tenorio, Jayson Castro, Matt Ganuelas-Rosser, Troy Rosario, Ryan Reyes, Ranidel de Ocampo, Marc Pingris, Ian Sangalang, Terrence Romeo ug Bobby Parks  Jr. 

Sila si Paul Lee, Jeff Chan ug Gabe Norwood   sa Rain or Shine ug Calvin Abueva sa Alaska ang wala  moapil tungod kay nagpadayon pa ang ilang finals series.   (BANAT NEWS)