CESAFI Partner’s Cup mabanhaw karong Sabado

CEBU, Philippines - Human malubong sa kalimot sud sa duha ka tuig, ang Cebu Schools Athletic Foundation, Inc. (CESAFI) Partner’s Cup mabanhaw karong Sabado alang sa ikawalo niining season diha sa Cebu  Coliseum.

Gipaluyohan sa telecom giant Smart Communications,  ang torneyo pormal nga gilusad sa mga nagpasiugda sa liga nga gipangulohan nilang  CESAFI commissioner Felix ‘Boy’ O. Tiukinhoy Jr. ug  Atty. Baldomero ‘Merong’ C. Estenzo kagahapon didto sa Cebu Parklane Hotel International.

“The purpose of holding the Partner’s Cup is for the teams to gauge their strengths and weaknesses, size up their rivals, and eventually help them put up a highly competitive team (for the regular CESAFI season),” matud pa ni Tiukinhoy.

Susama sab ang tonada sa panultihon ni Estenzo, nga mao sab ang team manager sa University of Cebu (UC) Webmasters.

“This tournament is important not only to give the players the needed exposure, but also to improve the capabilities of each team,” dason pa ni Estenzo.

Ubos sa lain-laing corporate backers, pito ka teams ang magsangka sa tulo ka semanang liga nga magsilbe sab nga CESAFI pre-season games.

Kini naglangkob sa Cebu Landmasters-University of San Carlos Warriors, Worthy-University of the Visayas Green Lancers, Mighty Sports-University of San Jose Recoletos Jaguars, My Led Opto-Cebu Institute of Technology University Wildcats, Highlands Corned Beef-UC Webmasters, Phinma-Southwestern University Cobras ug Tyron Properties-University of Southern Philippines Foundation Panthers.

Moduwa sila ubos sa single round robin format sa eliminasyon, diin ang top four magsangka sa laing round robin sa semifinals.

Ang top two magharong dayon sa kampiyonato sa usa ka best-of-three series, samtang ang mangatagak nga duha ka teams mag-abot sa knockout 3rd place,

Matud pa ni Tiukinhoy nga ang mga lagda sa CESAFI maoy sundon sa tibuok kompetisyon. (BANAT NEWS)