a+eba 2016 davies paints cup sugdan na karong adlawa

CEBU, Philippines - Unom ka mga koponan ang nagpanikad nga magtigi sa kampiyonato gumikan kay ang pasiunang komperensiya sa 2nd Architects+Engineers Basketball Association season nga ulohan og “A+EBA 2016 Davies Paints Cup” sugdan na karong alas-6  sa gabii diha sa University of San Carlos-Main gym.

Nag-una sa listahan sa mga entrante mao ang defending champion Mortaflex (kanhi Fusion) nga gilangkuban og mga lisensiyadong Mechnical Engineers ubos sa pagpangu ni Ed Bonphyl Macasling, ang Finals MVP sa miaging season.

Lain pang team nga   mosalmot mao ang Sun & Rain nga hiniusang puwersa sa mga arkitekto gikan sa UAP-Raja Humabon Chapter. Naglangkob sa mga markado nilang players mao ang reigning regular season MVP Michael Vincent Cinco uban nilang Jun Villacorta, Richard Anthony Badayos, Paolo Alberto, Josephril Partosa ug Mito Parba.

Ang nahibilin nga mga entranteng koponan mao ang Bio-Fresh, Mondo Skimcoat, Megacryl 500, ug Elastogel Extreme.

  Matud pa ni league president Paolo Alberto atol sa usa ka press conference sa miaging gabii didto sa Scape Skydeck sa Azon Residences sa dakbayan sa Lapu-Lapu, nga ang duha ka bulan nga torneyo magsubay og single round robin format,  diin ang top 2 makaangkon og ‘twice-to-beat’ incentive batok sa No. 3 ug No. 4 seeds. 

Ang mga mananaog magsangka dayon sa titulo sa usa ka knockout game. (BANAT PALARO)