Bag-ong lider milugwa sa Sinulog bowling
CEBU, Philippines - Laing lider na sab ang milugwa gumikan kay si Danny Sabang mao na’y nag-una sa qualifying round alang sa masters event sa 17th Sinulog Open National Tournament didto sa Gaisano Bowlingplex sa Barangay Banilad, dakbayan sa Sugbo.
Si Sabang sa CETBA-55 AB mihipos og 1,342 pinfalls sa tanang tulo ka events human sa upat ka adlaw nga kumbati aron pag-angkon sa temporaryong liderato.
Si Clarence Tiu mao na karon ang nahimutang sa ikaduhang puwesto uban sa iyang 1,334 pinfalls, samtang ang kanhi lider nga si Vivian Padawan nadakin-as ngadto sa ikatulo uban ang 1,326 pinfalls. Hinuon, si Padawan gihapon maoy nag-una sa seniors ug all-lady bowlers.
Sa singles event, si Ezzie Gan maoy nangu human mitali og 451 pins sud sa duha ka duwa. Nagsunod kaniya mao sila si Danny Sabang (450) ug Xyrra Cabusas (449).
Sila si Cabusas, Aui Padawan ug Bede Ilano maoy naglabaw sa team event uban ang tinigum nilang 1,252 pinfalls, samtang sila si Luke ug Sal Bolongan maoy kasamtangang nag-una sa doubles uban sa ilang 853 pinfalls. (BANAT PALARO)
- Latest
