Kerber Reyna sa Australian open
CEBU, Philippines - Si Angelique Kerber, ang seventh seed nga Germany tennis star maoy kampiyon sa women's division sa Australian Open human iyang gipakuratan si Serena Williams sa finals kaniadtong Sabado sa iskor, 6-4 3-6 6-4 didto sa Melbourne Park.
Ang 28 anyos nga si Kerber maoy unang German nga midaog og major singles title sukad kini mahimo ni Steffi Graf atol sa 1999 French Open.
Ang 34 anyos nga si Williams, napilde lang og lima ka higayon sa iyang 26 ka Grand Slam finals ug wala niya matabla ang record ni Graf nga 22 ka titles sa open-era nga torneyo.
Si Kerber, kinsa misalbar sa iyang match point atol sa first-round aron modaog batok kang Misaki Doi, mao na karo'y no. 2 sa world ranking.
Nasumpo ni Kerber ang kusog nga bola ni Williams ug midaog batok kang Wiliams sa labing unang higayon sa miaging unom ka pagbagat. Sa iyang Grand Slam final debut, mas maayong nakaduwa si Kerber kinsa igo lang nakahimo'g 13 ka errors kung itandi ni Williams nga may 46 ka errors overall. (BANAT NEWS)
- Latest
