SHS-Ateneo mipuwersa og Game 3 sa NBTC finals

CEBU, Philippines - Ang Sacred Heart School-Ateneo de Cebu Magis Eagles mibawos og labok sa University of the Visayas, 84-72, aron pagpuwersa og rubbermatch sa ilang best-of-three finals series alang sa SM NBTC League-Cebu title sa miaging adlaw didto sa Magis Eagles Arena sa SHS-Ateneo sa Barangay Canduman, dakbayan sa Mandaue.

Samtang sa pagsulat ning taho, ang duha ka protagonista nag-abot sa tinaktakay nga Game 3 din ang modaog maoy morepresentar sa Sugbu ngadto sa national finals karong Marso didto sa Mall of Asia Arena sa kaulohan.

Murag nahigmata ang Magis Eagles human mingsukarap sa Game 1 diin sila gibihag sa Baby Lancers sa overtime. Ning higayona, bagsik ang dinuwaan sa Eagles nga mibulhot ngadto sa 17 puntos nga labaw, 55-38, sa tunga-tungang bahin sa ikatulong kuwarter.

Kalit hinoon mitidlom ang opensa sa Magis Eagles hinungdan nga nakasikit ang Baby Lancers sa iskor nga 57-60 human sa ikatulong kuwarter pinaagi sa pagpanglimbasog ni Jancork Cabahug.

Apan wala magpabitin ang Eagles nga miratsada pagsugod sa katapusang kuwarter aron pag-inat sa ilang labaw ngadto sa 72-63 human sa 3-point shot ni Travis Mantua sa nahibilin nga 4:56 sa duwa. Mingsalida sab si Alex Visser nga mipuntos og sayes sa maong mainit nga rally.

Katapusang mipaduol ang Baby Lancers sa iskor nga 68-74 sa nahibilin nga 2:07 gumikan kay sila si Renzo Calumpang, Jed Colonia, Andrew Velasco, Errol Pastor ug Mantua milansang og walo sa 10 nila ka free throws aron pagselyado sa kadaogan sa Magis Eagles.

Si Colonia maoy nangu sa balanseng opensa sa Magis Eagles sa pagtali niini og 17 puntos, samtang sila si Pastor ug Velasco nagkumboya og 21 puntos. Sa gihapon, si Cabahug nagmangtas aron pagtapos og 29 puntos apan ning higayona pakyas siya sa habig sa  Baby Lancers. (BANAT SPORTS)