Thunder mipahagsa sa Rockets

CEBU, Philippines - Matag bagat nilang Russell Westbrook sa Oklahoma City Thunder ug ni Patrick Beverly sa Houston Rockets imposible gyud nga walay drama nga mahitabo.

Kagahapon adunay diyutay  nga   kasikas nga nahitabo  dihang midaog ang Thunder batok sa Rockets, 116-108 didto sa Chesapeake Energy Arena sa Oklahoma City. 

Ang maong duwa kagahapon naglambigit og 50 ka personal fouls, 31 ka turnovers ug usa ka ejection. 

Ang  forward  sa Thunder nga si Kevin Durant mibahog og 33 puntos  uban ang 12 ka rebounds ug tulo ka assists,  samtang  si Westbrook mikulit sa iyang ikaunom nga triple-double karon nga season  human siya mohimo  og   26 puntos, 14 ka assists ug 10 ka rebounds. 

Ang  sentro  nga  si  Enes Kanter miamot og 22 puntos ug 10 ka rebounds gikan sa bench alang sa Thunder, kinsa nagbaton na karon og 36-13 nga baraha.

Ang guard sa Rockets nga si James Harden mao sab ang nangu sa opensa sa iyang team human siya moburak og 33 puntos, pito ka rebounds ug pito sab ka assists, samtang si Corey Brewer miamot og 17 puntos alang sa Houston, kinsa midailos ngadto sa 25-24 nga baraha.

Sa nahabiling 6:17 ang oras sa fourth quarter, nakahimo’g  three-point play si Kyle Singler aron hatagan ang Thunder og nuybe puntos nga labaw ug gitubag sab dayon kini ni Harden sa iyang kaugalingon nga three-pointer aron mosikit sa iskor,  95-101.

Ang Oklahoma naglabaw og 11 puntos,  apan ang labing daku nga labaw miabot ngadto sa 14 puntos tungod kay wala na si Howard nga mobantay sa ilawom.  Si Howard na-ejected sa tunga-tungang bahin sa third period.

Milabaw pa unta ang Rockets og 12 puntos sa wala pa mo-rally ang Thunder. (BANAT PALARO)