Warriors miihaw sa Jaguars
CEBU, Philippines - Naka-eskapo ang USC Warriors sa higpit nila nga duwa batok sa USJ-R Jaguars, 61-59 sa 1st Capt. Raul Cabanero Inter-collegiate Basketball League niadtong Biyernes sa gabii didto sa Bulacao Sports Complex, Talisay City.
Miagi una og grabeng kakulba ang Warriors sa wala pa nila maangkon ang kadaugan.
Human magtabla, 59-all sa nahabiling 15 segundos, bola sa Jaguars ug may purohan unta nga maila ang daog, apan si Jaybie Mantilla na-out balance ug nakahimo’g turnover.
Sa ball possesion sa USC sa nahabiling 10 segundos, maampingon nga midala sa bola si Caesar Ian Ortega ug dayon mibuhi sa iyang marka bahala nga jumpshot nga maoy nakapadaog sa Warriors.
Gawas sa iyang pagluwas sa Warriors, si Ortega mao sab ang nangu sa opensa pinaagi sa iyang 29 puntos. Si Ralph Dinolan mao sab ang nangu sa Jaguars nga miposa’g 15 puntos.
Sa pasiunang duwa, ang UV Lancers midaog batok sa bisitang Colegio de Sta. Ana Bacolod, 87-67 sa ilang exhibition game.
Ang maong liga gipasiugdahan ni Bulacao Brgy. Capt. ug Talisay City ABC president Raul Cabanero. Gisuportahan kini sa Bulacao Barangay Council ug sa SK Task Force. Gipadagan ang mga duwa nilang konsehal Banjo Abastillas, Darwin Cabanero ug Agnes Lastimosa ug sa CEBRA pinangulohan ni Edwin Dejacto Sr. (BANAT PALARO)
- Latest
