Seno nakadepensa sa U18 title
CEBU, Philippines – Si Jan Godfrey Seno mipatigbabaw batok ni John Clyde Laquio sa all-Cebu finals aron pagdepensa sa iyang boys 18 title sa Cebu leg sa 10th Cebuana Lhuillier Age-Group Tennis Tournament kagahapon didto sa CitiGreen Tennis Resort sa Barangay Punta Princesa, dakbayan sa Sugbo.
Ang varsity sa University of San Carlos (USC) nga si Seno mipukan ni Laquio sa unang set sa iskor nga 6-3 ug nasustinir niini ang iyang kainit dayon na ngadto sa pagselyado sa ilang duwa, 6-2.
Ang 16-anyos nga garbo sa dakbayan sa Bogo wala pa mapilde sa kapin sa 10 ka duwa nila ni Laquio, lumad gikan sa dakbayan sa Naga.
Gawas ni Seno, duna pa’y laing mga Sugbuanon ang nanghawod sa ilang mga kategoriya.
Si Venz Anton Louise Alforque mibira
sa korona sa boys 14 human miposte og 6-3, 6-3 nga kadaugan batok ni Richard Bautista,
samtang ang Oponganon nga si Tiffany Claire Nocos maoy hara sa girls 12 human gibuntog ang Zamboangeña nga si Maria Maxiel Rica Labrador sud sa duha ka sets sa iskor nga 6-1 ug 6-4. (BANAT NEWS)
- Latest
