Spurs pabiling wa’y pilde sa ilang korte

CEBU, Philippines – Pabilin gihapon nga walay pilde ang San Antonio Spurs didto sa ilang homecourt human ilang gilubong ang Dallas Mavericks, 112-83 didto sa AT&T Center sa San Antonio, Texas.

Miarte na sab si LaMarcus Aldridge, kinsa miposa og 23 puntos alang sa Spurs, kinsa sayo kaayo nga nanginit. Si Aldridge nakakuha sab og maayong suporta gikan ni Jonathan Simmons, kinsa miamot og 14 puntos sa 15 minutos niya nga pagduwa.

Wala gihapo’y pilde ang Spurs sa ilang homecourt sud sa 24-0 ka duwa nga maoy ilang ika-33 nga sagunson nga daog didto sa AT&T Center sukad pa niadtong Marso sa miaging tuig.

Natupngan sab sa Spurs ang ilang best start human sa 42 ka duwa nga ilang nahimo niadtong 2010-2011 season.

Bisan sa ilang daog, may dautan lang gihapon nga balita ang Spurs tungod kay  wala makatiwas og duwa si Tony Parker, kinsa mibiya sa third quarter tungod sa hubag sa iyang hawak nga magpugos kaniya sa dili pagduwa og duha ka higayon.

Mihimo’g season-low sa puntos sa usa ka kuwarter ang Spurs, kinsa nabiyaan sa first period, 14-16 ug daghan sab sila’g turnovers ug may tulo lang ka baskets sulod sa unang 10 minutos.

Apan nasuwertihan ang Spurs tungod kay wala sab mangigo ang Dallas  ug natapos ang pagkubol sa Spurs dihang misulod na si Simmons.

Human sa iyang dunk nga natapalan ni JaVale McGee, mihimo og duha ka three-pointers si Simmons aron hatagan ang Spurs og 27-26 nga labaw.

Si Simmons maoy miduslit sa usa ka mainitong rally diin ilang na-outscore ang Dallas 32-20 didto sa second quarter.

Silang Boris Diaw ug Kawhi Leonard mibahog og 16 ug 15 puntos matag usa alang sa Spurs.

Sa laing bahin, si Russell Westbrook mikulit sa iyang ika-24 nga career triple-double aron tabangan ang Oklahoma City Thunder pagbuntog sa Miami Heat, 99-74 didto sa Chesapeake Energy Arena.

Si Westbrook mihimo’g 13 puntos, 15  ka assists ug 10 ka rebounds nga maoy iyang ikalima nga triple-double karon nga season.

Hinuon, si Kevin Durant maoy nangu sa opensa sa Thunder  nga mipadahunog og 24 puntos uban sa iyang 10 ka rebounds. Si   Serge Ibaka mitampo’g 19 puntos, samtang si   Dion Waiters midugang og 18 puntos aron maangkon ang ika-30 nga daog sa Thunder karon nga season.

Si Dwyane Wade mao usab ang nangu sa Heat sa iyang 22 puntos, gisundan ni Hassan Whiteside nga adunay 14 puntos ug 11 ka rebounds.

Sa lain pang mga duwa,  ang Houston Rockets milampurnas sa Los Angeles Lakers,  112-95, gilubong sa Minnesota Timberwolves ang Phoenix Suns, 117-87 ug  ang Denver Nuggets midaog  batok sa Indiana Pacers, 129-126. (BANAT NEWS)