IM Yap naghari sa Muslim-Christian chessfest
CEBU, Philippines - Si International Master Kim Steven Yap mibuntog ni Yves Fiel sa ikapito ug katapusang hugna aron pagdominar sa labing unang Cebu Muslim-Christian Friendship Open Chess Tournament niadtong Domingo sa Chessmoso Chess Club sa Colonnade Mall, dalan Colon ning dakbayan sa Sugbu.
Gitapos ni Yap ang torneyo bitbit ang labing taas nga 6.5 puntos aron pagbulsa sa ganti nga P8,000.
Si Allan Salientes, nga mipilde ni Ronald Ganzon sa katapusan niyang duwa, nagsolo sa ikaduhang dapit human mitali og 6.0 puntos. Mibira siya og P6,000.
Sila si FIDE Master Anthony Makinano, Edsel Montoya ug NM Rogelio Enriquez parehong mikulit og 5.5 puntos apan si Makinano maoy na-3rd gumikan sa mas taas niining tie-breaker.
Nagkumpleto sa top 11 bitbit ang 5.0 puntos matag usa mao sila si Carlos Moreno III, Yves Fiel, Fernando Pialan, Ronald Ganzon, Richard Natividad, ug William Retanal, Jr.
Sa kiddies ug ladies division, sila si Aldritz Pondoyo, Keith Claire Morala ug Jeremy Pepito mitali og managsamang 6.0 puntos apan si Pondoyo maoy gideklara nga kampiyon gumikan sa mas taas niyang tie-breaker.
Si Michael Gocotano mipahiluna sa ikaupat nga dapit dala ang 5.5 puntos, samtang nagsawo sa ikalima hangtud sa ikawalo nga puwesto mao sila si John Lester Belano, Aaron Resma, KC Belano ug Lyan Portes nga dunay tag 5.0 puntos.
Ang duha ka adlaw nga torneyo gipasiugdahan sa Association of Cebu Muslim Professionals and Entrepreneurs, Inc. (ACMEP) inabagan sa Cebu Executives and Professionals Chess Association (CEPCA).
- Latest
