Tabal misidlak sa Hong Kong
CEBU, Philippines - Nadugangan na usab ang mga kampiyonato ni Cebuana running star Mary Joy Tabal human niya gisakiyo ang overall championship sa 21K women's open race sa 2016 Standard Chartered Hong Kong Marathon kagahapon didto sa Victoria Park.
Si Tabal kinsa mipwesto sa ikaduhang dapit sa miaging tuig, kusug nga mibalik diin hingpit na niyang giangkon ang korona sa 21K women's sud sa usa ka oras, 21 minutos ug 41 segundos. Ang taga-Taiwan nga si You Ya Jyun maoy second placer sa oras nga 1:22:27, samtang ang taga-Japan nga si Asada Shido mitugpa sa ikatulo sa oras nga 1:24:27.
Milampos ang 26-anyos nga Cebuana bisan pa sa grabeng kabug-at sa klima didto sa Hong Kong. "Nangaluya gyud mi pag-abot sa hotel. Wala na gani mi dinner kay natulog na gyud mi,” matud pa niya.
Sa maong kadaugan, si Tabal nakakuha og kompiyansa sa iyang sunod nga pagpangandam sa mas lisud nga misyon nga mao ang paglabni og luna sa 2016 Olympics pinaagi sa Boston Marathon.
- Latest
