Crawford Bradley modaog batok Pacquiao

CEBU, Philippines – Bisag asang anggulo tan-awon, dominado ni Manny Pacquiao si Tim Bradley sa una nilang duha ka away.

Kulatado ug klarong wa’y dag-anan si Bradley, apan sa dili mahisabtan nga hinungdan, ang Amerikanong  boksidor maoy gideklara nga mananaog pinaagi sa kuwestiyonableng split decision sa una nilang engkuwentro niadtong Hulyo 2012.

Daghan ang nasagmuyo sa maong desisyon nga sa mata sa kadaghanan usa ka dakung surambaw.

Apan alang ni Terence Crawford, ang wa’y pildeng WBO super lightweight champion, nga si Bradley gyud maoy daog sa maong away.

Gidepensaan sab ni Crawford si Bradley nga alang kaniya angayan lamang nga hatagan og higayon nga sangkaon og balik si Pacquiao.

Ang duha mag-abot sa ikatulong higayon sa gibandiwag nga katapusang away ni Pacquiao karong Abril 9 didto sa MGM Grand sa Las Vegas.

Sama sa iyang tan-aw sa unang away, si Crawford masaligon nga modaog na usab si Bradley batok sa Pinoy ring superstar.