Spurs daog batok Cavs

CEBU, Philippines – Midaog lang og tres puntos ang San Antonio Spurs batok sa Cleveland Cavaliers, 99-95, apan igo na kaayo kini aron magpabiling wa’y pilde sa ilang homecourt karon nga season sa NBA heavyweight showdown kagahapon didto sa AT&T  Center sa San Antonio, Texas.

Ang point guard nga si Tony Parker miburak og 24 puntos ug  si Kawhi Leonard midugang og 20 puntos uban ang 10 ka rebounds alang sa Spurs, kinsa adunay 23-0 record sa ilang homecourt karon nga season  ug milanat na sa 32 ka daog didto sa AT&T Center sa usa ka dominanteng streak nga naundang lang niadtong Marso sa miaging tuig dihang napilde sila sa overtime batok sa Cavs.

Si Parker daan nang mihimo’g 18 puntos sa first half aron tabangan ang Spurs nga mao kanunay  naglabaw.

Sa second half, si Leonard na sab maoy namuntos  diin mihimo siya’g 16 puntos ug siya sab ang nagdepensa ni LeBron James aron mapugngan ngadto lang sa siyete puntos  sa halftime.

Si David West miamot og 13 puntos  lakip sa duha ka baskets nga nakapainat og maayo sa labaw sa Spurs sa nahabiling 1:07 sa fourth period.

Ang Cleveland, kinsa aduna karo’y 27-10 nga baraha  gipangulohan ni James sa iyang 23 puntos, gisundan ni Tristan Thompson sa iyang  season-high 18 puntos ug milangkat og 13  ka rebounds.

Ang Spurs aduna na’y 35-6 nga baraha ug maoy ikaduha sa  team standing sa Western Conference sunod sa Golden State Warriors.

Sa laing mga duwa, si Jimmy Butler mibahog og career-high 52 puntos  aron pangulohan ang Chicago Bulls  nga mipilde sa Philadelphia Sixers, 115-111.

Milangkat sab siya og 10 ka rebounds ug unom ka assists alang sa Bulls, kinsa nagduwa nga wala silang Pau Gasol ug si Derrick Rose.

Ang Bulls nga nabiyaan og 24 puntos  sa second quarter, miputol sa ilang  three-game losing streak ug wala nila tugoti ang Sixers nga makahimo'g upset.

Si Butler maoy ikaupat nga player sa kasaysayan sa Bulls nga miiskor og kapin 50 puntos human nilang legendary Michael Jordan, Jamal Crawford ug  Chet Walker.

Midaog sab ang Toronto Raptors batok sa Orlando Magic sa overtime, 106-103 didto sa O2 Arena sa London.

Ang Memphis Grizzlies nakaipsot sa Detroit Pistons,  103-101,  ang Sacramento Kings   naka-eskapo sab batok sa Utah Jazz, 103-101 ug ang  Golden State Warriors milubong sa Los Angeles Lakers, 116-98