Espinosa misakmit sa women's open title
CEBU, Philippines - Nakasungasong ang Cebuana nga si Hannah Grace Espinosa gikan sa lisud nga hagit batok ni Maricel Mirabueno sa Mindanao aron masakmit ang women’s open title sa Cebu leg sa Peugeot Philippine Tennis Open kagahapon didto sa Cebu Country Club.
Ang No. 1 seed nga si Espinosa mipagawas sa tanan niyang kusog aron mokulit og 6-3, 6-4 nga kadaugan batok ni Mirabueno.
Usa ka upset ang tuyo ni Mirabueno tungod kay nakahimo na siya pagtaktak sa ubang mga topseeds sama nila ni Maria Dominique Ong, Zethley Mae Alferez ug Erika Manduriao, apan wala siya kaugpo ni Espinosa.
Angay sab hinuon nga magmaya si Mirabueno gumikan kay mibitbit siya og titulo uban ni Floresa Alesna sa doubles event diin ilang gipilde sila si Ingrid Gonzales ug Kendies Thea Malinis, 6-1, 6-1.
Sa maong kadaugan, si Espinosa nakakuha og luna sa national finals didto sa Manila. Mobulsa usab siya og P20,000, libreng accomodation ug give-aways gikan sa Wilson. (BANAT PALARO)
- Latest
