Beermen mosakmit luna sa finals

CEBU, Philippines - Kulbahinam nga duwa ang masaksihan karon sa PBA dihang mag-abot pag-usab ang San Miguel Beermen ug Rain or Shine Elasto Painters sa krusyal nga Game-6 sa ilang “best-of-seven” semifinals series didto sa Smart Araneta Coliseum.

Ang Beermen mipaduol sa finals human sa ilang 103-94 nga kadaugan sa Game-5 niadtong Miyerkules ug ang ilang daog karon mohatod kanila  alang sa ilang ika-36 nga finals appearance.

Si Beermen coach Leo Austria nalipay tungod kay sa katapusang duha nila ka daog, napakita sa iyang koponan nga wala lang sila magsalig sa opensa ni MVP JuneMar Fajardo.

Si Fajardo mihimo og 27 puntos sa Game-5 layo   sa iyang semifinals average nga 38 points, apan midaog sila tungod  kay misuporta man ang kaubanan niya.

Si Austria naglaum nga  makapakita gihapon og balanseng opensa ang iyang koponan ug pipila sa iyang mga gisaligan mao sila si Marcio Lassiter, Arwind Santos uban ang mga bench players nga sila si Gabby Espinas, Chris Ross ug ex-Rain or Shine player Ryan Arana.

Sa ilang bahin, si Painters coach Yeng Guiao miangkon nga mibahar ilang depensa ilabi na sa Game-5 diin gitugtan nila ang Beermen nga makapasud sa ilang mga outside shots.

Ning higayona, si Guiao mimando sa iyang mga players nga tutokan ang opensa ug depensa sa duwa karon batok sa San Miguel aron pagpugos sa serye ngadto sa 'do-or-die' Game-7 sa Domingo.

Ang modaog tali sa San Miguel ug Rain or Shine maoy moabante sa finals ug ilang harungon ang nagpaabot nga Alaska Aces nga una na nga nakasud sa finals human gitagak ang GlobalPort Batang Pier sa ilang kaugalingong semifinal series, 4-1. (BANAT PALARO)