J. Espina Wildcats, USPF gisubha’g daog

CEBU, Philippines – Misungkab dayon og dayog ang J. Espina Agrivet Wildcats pagsugod sa 1st Capt. Raul Cabanero Inter-collegiate  Basketball Tournament niadtong Domingo didto sa Bulacao Sports Complex, dakbayan sa Talisay.

Ang JEA Wildcats mi-rally sa fourth quarter aron pagpukan sa University of San Carlos (USC) Warriors, 69-62 sa all-local caging.

Wala kapugngi si Joshua dela Cerna, kinsa mihimo’g 31 puntos ug 10 ka rebounds aron pangulohan ang J. Espina Agrivet. Mihimo sab og double figures silang Jose Allan Dimco ug Jose Marlo Pono sa ilang 12 ug 10 puntos matag usa.

Naglisud ang JEA Wildcats sa unang tulo ka kuwarter batok sa mas tag-as ug dagku nga USC Warriors, apan si coach Bembem Alcaraz mihimo og kausaban sa iyang game plan aron mohimo og ‘come-from-behind’ nga kadaugan.

Ang JEA Wildcats miduwa nga wala ang usa sa ilang shooter nga si Jonher Espina, kinsa niduwa og laing torneyo didto sa Catmon.

Nabanhaw ang paglaum sa J. Espina Agrivet Wildcats nga modaog dihang milabaw kini og uno punto pinaagi sa follow-up shot ni John Anthony Lucena   paghuman sa third period, 46-45.

Sila si Ian Ortega ug Charles Pepito nagkumboya’g 27 puntos aron pangulohan ang USC Warriors.

Sa pasiunang duwa, ang University of Southern Philippines (USPF) Panthers gisubhan sab og daog batok sa University of Cebu (UC)  Webmasters,  86-78.

Ubos sa tema: Building Unity and Peace Through Teamwork and the Spirit of Sportsmanship, ang liga namugna pinaagi sa paningkamot ni Talisay City ABC President ug Bulacao Brgy. Capt. Raul Cabanero inabagan ni  league commissioner ug councilor Banjo Abastillas, deputy nga si councilor Darwin Cabanero,  committee on sports sa barangay Bulacao nga si councilor Agnes Lastimosa.

Ang liga gidumala  sa Cebu Basketball Referee Association (CEBRA) sa pagpangulo ni CESAFI head referee Edwin Dejacto Sr.

Puntos Matag Usa

Unang duwa:

USPF (86) – Avanceña 24,  Colina 19, Benjamunde 15, Ceniza 10, Bolivar 8, Quiachon 6, Batac 4.

UC (76) – Puerto 20, Delator 12, Dacalos 10, Jabello 7, Culango 7, Tagudin 6, Villarta 4, Osabel 2, Suelo 1.

Ikaduhang duwa:

J. ESPINA AGRIVET (69) – Dela Cerna 31, Dimco 12, Pono 10, Lucena 9, Sanchez 5, Bucao 2.

USC (62) – Ortega 14, Pepito 13, Tagapan 8, Laguyo 7, Catapusan 5, McAloney 4, Adlawan 4, Arjon 4, Oleodo 3. (BANAT NEWS)