GlobalPort di pa musurender
CEBU, Philippines – Gamay na lang ang purohan sa GlobalPort Batang Pier nga moabante sa finals sa PBA Philippine Cup human sa ilang kapildihan batok sa Alaska Aces niadtong Domingo nga mibutang kanila sa lisud nga 1-3 nga pagkalubong sa ilang best-of-seven semis series.
Apan ang Batang Pier wala pa mawad-i sa paglaum ug positibo sila nga mabuhat ang lisud nga tahas nga makabawi ug mailog pa ang kahigayonan nga moduwa sa finals.
Ang Alaska ug GlobalPort magsangka sa Game-5 karong gabii didto sa Smart Araneta Coliseum.
Ang sinaligan sa GlobalPort nga si Terrence Romeo miangkon nga human sa iyang 41 puntos sa Game- 1 diin sila midaog, naglisud na siya sa gihimong adjustment sa depensa sa Alaska batok kaniya. Apan masaligon siya nga makabangon sila sa duwa karon ug makakuha og igong suporta sa opensa gikan sa iyang kaubanan.
Ang teammate ni Romeo nga si Joseph Yeo miingon nga kun modaog sila karon, mosaka pagbalik ang kompiyansa sa iyang mga teammates paingon sa tahas nila nga makahimo og usa ka 'come-from-behind' nga kadaugan sa semis batok sa Alaska.
Sa ilang bahin, ang Alaska ni coach Alex Compton sayod kun unsa ka delikado ang GlobalPort rason nga dili na nila kini hatagan pa og higayon nga makarekober. Sukwahi sa GlobalPort, ang Alaska adunay daghang opsiyon sa opensa hinungdan nga lisud silang depensahan. (BANAT NEWS)
- Latest
