Blue Lane vs. Petracorta sa finals

CEBU, Philippines – Parehong miabante sa finals sa Aduana Legends basketball tournament ang no. 2 seed Blue Lane Brokers ug ang 4th seed Petracorta Brokers human ilang gitaktak ang ilang tagsa-taga ka kaatbang kaniadtong Sabado, Enero 9  atol sa crossover semifinals didto sa barangay San Roque gym, ning dakbayan.

Nasakmit sa Blue Lane ng unang luna sa finals human sa ilang 60-47 nga kadaogan batok sa Joycan Transport Services samtang miabante sab sa finals ang Petracorta Brokers ni Limasawa Mayor Melchor Petracorta human sila maka-ipsot batok sa topseed nga PRM Brokers, 54-48.

Ang three-pointer ni Mayor Petracorta maoy naghatag sa iyang team og 48-42  nga labaw may 2:45 ang nahibiling oras sa fourth quarter ug gikan niadtong higayona, wala na makaapas ang PRM.

Usa sa rason nga milampos ang Petracorta sa ilang tinguha nga moabante sa finals tungod kay nakabentaha sila sa hangin pinaagi sa presensiya ni Inting Bacalla batok sa mga batos ni broker Primitivo Mondin.

Silang Bacalla, Tata Amahit ug Tony Largosa pulos mibaghug og 12 puntos matag usa aron pangulohan ang opensa sa Petracorta Brokers ug wala nay laing ubang teammates ang nakahimo'g double figures.

Si Loreto Castillo maoy nangu sa PRM Brokers sa iyang 16 puntos. Ang PRM miposte sa ilang labing dakong labaw nga sayis puntos atol sa halftime, 27-21.

Sa sayo pa, duha ka higayon nga mi-rally ang Joycan Transport Services ni Roy Canillas aron papason ang ilang 13 puntos ngadto na lang sa dos puntos nga biya apan pakyas sila sa ilang rally  tungod kay wala'y igong suporta su Ferdie Sigue kinsa maoy bugtong nakahimo'g double figures alang sa Joycan sa iyang 13 puntos.

Wala makapuntos si Jingjing Rama alang sa Blue Lane  apan ang iyang mga assists maoy nahimong yawe sa ilang kadaogan tungod kay nahimong sayon sa iyang mga teammates ang pag-iskor nga dili daling madepensa-an sa ilang mga kaatbang.

Ang championship game pagahimoon unya pa sa Enero 23 didto gihapon sa San Roque gym alang sa pagtamud sa mga kalihokan sa Sinulog unya sa Enero 16.

Puntos matag usa:

First Game:

Blue Lane (60) – Labajo 15, Pastor 8, Garcia 8, Medalle 6, Carmen 5, Monteno 4, Ordeniza 4, Respecio 3, Lopez 1.

Joycan Transport (47) – Sigue 14, Gayo 8, Lambaya 7, Ebrado 4, Nacario 4, Solis 2, Dela Cerna 2, Camayan 2, Jaca 2, Canal 1.

Second Game:

Petracorta Brokers (54) – Largosa 12, Amahait 12, Bacalla 12, Nadal 5, J. Petracorta 5, M. Petracorta 3, Palad 3, N. Petracorta 3.

PRM Brokers (48) – Castillo 16, Aragon 11, Solidarios 9, Ibu 5, Baillo 3, Lopez 3, Batuto 1. (BANAT NEWS)