Kenyans nanghawod sa Cebu City Marathon

CEBU, Philippines – Ang gikahadlokang Kenyan runners nga gipangulohan nilang Eric Kibiwoot Chepsiror ug Monica Nieru nangharos na sab, apan ang garbo sa Sugbu nga si Noel Tillor mihatag sa tagilungsod niyang mga Sugbuanon og butang nga ikalipay human iyang gisakmit ang all-Filipino title sa 2016 Cebu City Marathon kagahapon didto sa Cebu IT Park sa Barangay Apas.

Mao pa lamang kini ang unang higayon nga misalmot si Chepsiror sa maong lumba apan mihimo dayon siya og kasikas human mirehistro sa labing paspas nga oras. Iyang gitapos ang 42.195 ka kilometro nga karera sud lamang sa duha ka oras, 26 minutos ug 27 segundos.

Nagsunod kaniya mao ra sab ang kababayan niyang sila si Elisha Sawe (2:29:37) ug Jackson Chipchip (2:32:18).

Bisan pa man niini, nagmaya gihapon ang mga Sugbuanon kay si Tillor maoy labing paspas sa tanang Pinoy'ng entrante human mitapos isip 5th overall sa oras nga 2:43:45. Nagsunod kaniya si Jeson Agravante (2:47:48) ug dayon si Paul James Zafico (3:01:19).

Dominante sab kaayo ang mga Kenyans sa women's side. Si Nieru maoy gikoronahang hara sa oras nga 2:53:42. Nag-okupar sa sunod nga duha ka luna mao ang kababayan niyang si Milka Chebokel (3:12:03) ug Susan Chepwoky (3:21:44).

Sa all-Filipina class, si Jennylyn Nobleza maoy mipatigbabaw sa oras nga 3:25:52. Ang Cebu-based ultra racer nga si Ruffa Sorongon nalandig sa ikaduhang dapit sa oras nga 3:27:51, samtang si  Lizane Abella maoy na-3rd (3:46:53).

Sa 21K, ang top 3 mao sila si Prince Joey Lee (1:23:45), Azlan Dalompines (1:24:51) ug John Philip Duenas (1:25:39) sa men's category ug sila si Mereeis Ramirez (1:38:49), Joan Romanos (1:43:37) ug Kristy Abello (1:50:02) sa women's division.

Samtang ang nanghawod sa 5K mao sila si Arnel Florentino (16:52) ug Cherry Andrin (20:14). (BANAT NEWS)