Don Bosco nangharos sa 2016 Sinulog bootfest
CEBU, Philippines – Kay wala makapakita’g aksiyon sa miaging tuig, namawi ang Don Bosco Technology Center (DBTC) booters pinaagi sa paghakot og tulo ka titulo sa 2016 Sinulog Football Festival kagahapon didto sa ilang nataran sa Barangay Punta Princesa, dakbayan sa Sugbo.
Human sa unang adlaw ning duha ka adlaw nga torneyo nga giorganisar sa Cebu Football Association (CFA), ang Bosconians miharos og bira sa korona sa boys 15, boys 13 ug under-7 division.
Si Dustin Ramirez maoy milansang sa winning goal sa dihang ang DBTC miangkon og balik sa ilang trono sa under-15 category human miposte og 1-0 nga kadaugan batok sa Tabor Hills.
Nagmaya sab ang DBTC sa under-7 age group human ilang gidominar ang Guiseppe FC.
Pipila ka minuto ang milabay, ang DBTC Team 1 nanghawod sab sa under-13 class human gibuntog ang Sacred Heart School-Ateneo de Cebu, 1-0.
Sa women’s bracket, ang St. Theresa’s College milangkat sa korona sa under-15 division human gilupig ang Phoenix FC sa penalty shootout, 2-0. (BANAT NEWS)
- Latest
