Spurs nakaipsot

CEBU, Philippines – Dili tiaw ang kakulba sa San Antonio Spurs dihang diriyot maputol ang ilang home-game winning streak, apan ang ilang balanse nga opensa maoy rason sa ilang kulbahinam nga kadaugan batok sa New York Knicks, 100-99 sa nagpadayong aksiyon sa National Basketball Association kagahgapon didto sa AT&T Center sa San Antonio Texas.

May higayon pa untang modaog ang Knicks, kinsa mi-rally human mabiyai og 12 puntos, apan misipyat si Jose Calderon sa iyang     three-point attempt sa wala pa mohuni ang final buzzer. 

Perpekto pa gihapon  ang Spurs sa ilang homecourt sa ilang 22-0 ug aduna na’y 32-6 nga baraha nga maoy ikaduhang maayo sa Western Conferecne sunod sa defending champion Golden State Warriors.

Si Kawhi Leonard maoy nangu sa Spurs sa iyang 19 puntos, samtang ang rookie nga si Kristaps Porzingis mao usab ang nangu sa Knicks (18-20) sa iyang 28 puntos. Si Porzingis, kinsa milangkat sab og 11 ka rebounds maoy  usa sa contenders pagka-Rookie of the Year.

Si Anthony midugang og 20 puntos alang sa Knicks, kinsa pakyas pagpahamtang sa  Spurs  sa labing unang pilde sa ilang korte karon nga season.  

Naglabaw ang Knicks og nuybe puntos sa second quarter, apan wala nila masustineri ang  labaw hinungdan nga pakyas sila sa ilang tinguha paghimo’g upset.

Misikit unta og usa ka lugas ang Knicks  dihang si Arron Afflalo mipasud sa iyang ikaduhang 3-pointer sa katapusang dos minutos sa final period, 97-98

Apan kanunay adunay tubag si Tony Parker, kansang lay-up sa nahabiling 33 segundos maoy misalbar sa Spurs. Ang alley-oop basket ni Porzingis nakapasikit pag-usab   sa  duwa, 99-100, Nabuhi ang Knicks human mosipyat ang Spurs sa ilang katapusang tirada, apan misipyat sab si Calderon sa iyang kaugalingong final attempt. 

Silang LaMarcus Aldridge ug Manu Ginobili parehong miamot og 14 puntos alang sa Spurs.  (BANAT NEWS)