Bulls daog na sab

CEBU, Philippines – Parehong miiskor og double figures silang Jimmy Butler, Derrick Rose ug Pau Gasol aron pangulohan ang Chicago Bulls ngadto sa ilang 101-92 nga kadaugan batok sa Boston Celtics sa nagpadayong aksiyon sa National Basketball Association kagahapon didto sa United Center sa Chicago, Illinois.

Si Butler maoy kinadaghanang nahipos nga iskor alang sa Bulls nga midaro og 19 puntos ug  mihimo’g 10 ka assists, gisundan ni Rose sa iyang 18 puntos, samtang si Gasol   adunay 17 puntos ug milangkat og 18 ka rebounds nga maoy ika-19 niyang double-double karon nga season.

Miiskor sab og double figures si  Nikola Morotic   pinaagi sa iyang 11 puntos aron tabangan ang Bulls nga mosakmit sa ilang season-high winning streak nga unom ka sagunson nga daog.

Si Jae Crowder mao sab ang nangu sa Celtics nga mikulit og 17 puntos samtang  si Kelly Olynyk midugang og 16 puntos.

Ang Bulls, kinsa igo lang naglabaw og usa ka palito sa halftime, 48-47, milusad og hugot nga depensa uban ang nagbagang opensa sa mosunod nga mga kuwarter aron mainat ang ilang labaw ngadto sa 11 puntos, 74-63 sa fourth period.

Ila lang gitugotan ang  Celtics nga mohimo og 33.8 percent shooting sa third period itandi sa ilang 42.5 percent.

Si Butler mihimo og upat ka assists sulod na sa 10 ka duwa nga maoy labing daghan niyang nahimo sa iyang career.

Wala gihapon makaduwa alang sa Bulls si Joakim Noah sud na sa  11 ka higayon tungod sa piang nga wa'ang abaga. Hinuon, gikatakda nga mobalik na siya og duwa sunod semana.

Sa laing  duwa,  ang Atlanta Hawks milubong sa Philadelphia Sixers sa iskor nga 126-98 didto sa Wachovia Center sa Philadelphia, Pensylvania.

Si Kent Bazemore miiskor og 22 puntos aron pangulohan ang Hawks, samtang sila si Paul Millsap ug Al Horford parehong mitusik og 18 puntos.

Si Bazemore adunay nuybe puntos ug duha ka steals sa katapusang 3:12 sa third period aron tabangan ang Hawks pag-inat sa ilang labaw ngadto sa 21 puntos.

Midaog sab ang Houston Rockets   batok sa Utah Jazz, 103-94 didto sa  Toyota Center sa Houston, Texas.

Gitimonan ni James Harden ang Rockets nga mikulit og 33 puntos.

Ang Sacramento Kings midaog batok sa Los Angeles Lakers, 118-115 sa pagpangulo ni DeMarcus Cousins, kinsa mibahog og 29 puntos, 10 ka rebounds ug pito ka assists.