Crawford modepensa batok Lundy
CEBU, Philippines - Human giisnab ni Manny Pacquiao, si WBO super lightweight champion Terence ‘Bud’ Crawford gikatakda nga modepensa sa iyang titulo batok ni Hank Lundy karong Pebrero 27 didto sa Madison Square Garden sa New York.
Si Crawford, lumad gikan sa Omaha, Nebraska, wa’y pilde sa 27 ka away diin 19 sa iyang mga biktima pulos gipangtumba.
Iyang gipakamang si Dierry Jean sa ika-10 nga hugna sa katapusan niyang away niadtong Nobiyembre ug nanghinaut siya nga makasangka si Pacquiao.
Pakyas hinuon si Crawford sa iyang gilaraw gumikan kay si WBO welterweight champion Tim Bradley maoy gipili ni Pacquiao aron maoy harungon sa gipasiatab nga katapusan niyang away karong Abril 9 didto sa MGM Grand sa Las Vegas.
Si Crawford, kinsa mao sab ang nagkupot sa WBO lightweight belt, dunay 5-0 nga baraha sa mga world title fights, samtang si Lundy naglukdo og rekord nga 26-5-1 uban ang 13KOs. (BANAT PALARO)
- Latest
