Abueva multa’g P41,600

CEBU, Philippines - Gipamulta og P41,600 si Aces star Calvin Abueva sa PBA Commissioner’s  office tungod sa iyang partisipasyon sa nahitabong kagubot sa Game-2 sa ilang best-of-seven semifinal series batok GlobalPort Batang Pier.

Dili lang si Abueva ang gipamulta tungod sa maong kagubot, apan siya ang nabug-atan tungod  sa nakita sa Commissioner’s office nga siya maoy nagsugod sa  kagubot.

Si Abueva nakit-ang midasmag ni Anthony Semerad sa Batang Pier ug gikan didto, naapil na sa kagubot ang ubang players sa duha ka teams.

Ang Aces forward gipabayad og P20,000 sa pagsugod sa gubot usban sa laing P10,000 dihang iyang gisyagitan si GlobalPort governor Erick Areola ug dugang P11,600 sa iyang pagsuway og hasmag nila ni Semerad ug Jay Washington.

Gipabayad usab si Washington og P4,000 tungod sa iyang pagpadaku sa maong lamok-lamok, samtang ang teammate ni Abueva nga si Vic Manuel gipamulta og P11,600 tungod sa pagtukmod niya ni Washington. (BANAT PALARO)