Williams miluwas sa Dallas

CEBU, Philippines – Giluwas ni Deron Williams ang Dallas Mavericks pinaagi  sa iyang buzzer-beating 3-pointer  sa second overtime, 117-116 batok sa Sacramento Kings sa duwa nila sa National Basketball Association kagahapon didto sa American Airlines Center sa Dallas, Texas. 

Si Williams midawat og pasa gikan ni Devin Harris sa nahabiling 2.3 segundos sa duwa ug mihata kang Rudy Gay ug dayong itsa sa bola atol sa paghuni sa buzzer. 

Pipila ka segundos ang milabay, gihugopan dayon si Williams sa iyang mga teammates sulod sa korte. .

“That was definitely my first Mavericks mob scene”, matud pa ni Williams nga maoy nangu sa Mavs sa iyang 25 puntos nga naglakip og tulo sa unom ka tirada gikan sa three-point area lakip ang winning triple. 

Si Dirk Nowitzki miposa og tres  sa sayo pa alang sa Mavs, kinsa mihimo’g sagunson otso puntos gikan sa ilang 109-116 nga biya sa 1:20 ang oras nga nahabilin sa second overtime hinungdan nga nakaipsot sila og usa ka lugas nga kadaugan.

Si DeMarcus Cousins mibahog og 35 puntos alang sa Kings nga maoy iyang ikatulong sagunson nga higayon nga miiskor siya’g kapin 30 puntos nga naglakip sa iyang buzzer-beating lay-up alang sa 98-all tie human sa regulasyon.

Ang kanhi Dallas guard nga si Rajon Rondo wala makaduwa uban sa Kings tungod sa back spasms.

Ang kadaugan sa Dallas batok sa   Sacramento maoy ikaduhang labing taas nga streak karon batok sa usa ka NBA team sunod sa San Antonio Spurs nga midaog na og 32 ka higayon batok sa Golden State Warriors, sumala pa sa STATS.

Ang Kings wala pa modaog batok sa Mavs sa regular season gikan pa niadtong Pebrero 27, 2003 dihang nakaipsot ang Kings,126-124 pinaagi gihapon sa overtime. 

Midaog ang Sacramento og usa ka duwa batok sa Dallas sa usa ka five-game playoff series niadtong  2004.

Sa laing mga duwa,  ang New York Knicks mibihag sa Atlanta Hawks, 107-101 diin nagkainitay silang Kristaps Porzingis sa Knicks  ug Kent Bazemore sa Hawks.

Midaog sab ang Chicago Bulls human nila gisungay ang Milwaukee Bucks sa iskor nga 117-106 ug ang defending champion Golden State Warriors milubong sa Los Angeles Lakers sa iskor nga 109-88. (BANAT NEWS)