1st Captain Raul Cabanero Cup gitakda
CEBU, Philippines – Ang Barangay Bulacao sa dakbayan sa Talisay mopasiugda og Inter-collegiate basketball tournament nga pagauloha’g “1st Captain Raul Cabanero Cup” nga gikatakdang sugdan karong Enero 20 diha sa Bulacao gym, Talisay City.
Unom ka teams ang kompirmadong mosalmot sa maong torneyo nga pangulohan sa 15th CESAFI champion University of San Carlos (USC) Warriors ug runner-up University of the Visayas (UV) Green Lancers.
Laing upat nga mopakita’g aksiyon mao ang University of San Jose-Recoletos (USJ-R) Jaguars, University of Cebu (UC) Webmasters, University of Southern Philippines Foundation (USPF) Panthers ug Cebu Institute of Technology-University (CIT-U) Wildcats.
Matud pa ni league commissioner nga si Bulacao barangay councilor Banjo Abastillas nga ang mga koponan bahinon sa duha ka bracket diin mosubay kini og single round robin format.
Ang top 2 sa matag bracket magsangka sa crossover diin No. 1 sa bracket A moharong sa No. 2 sa bracket B ug ang No. 1 bracket B moduwa sa No. 2 sa bracket A. Ang mga modaog maoy mag-abot sa kampiyonato ug mga pilde mag-ilog alang sa ikatulong dapit. Ang mokampiyon mobulsa og P50,000, ang runner-up modawat og P30,000.
Mopahiluna sa ikatulo makaangkon og P20,000, samtang ang motungtong sa ikaupat nga dapit makadawat og P10,000.
Ang maong torneyo namugna pinaagi sa paningkamot ni Bulacao Brgy. Capt. Raul Cabanero inabagan sab ni commissioner Banjo Abastillas ug deputy nga si councilor Darwin Cabanero.
Sa laing bahin, himuon ang coaches meeting karong Enero 8 sa alas-10 sa buntag diha sa Bulacao, Talisay Barangay Hall aron pagpinalisar sa maong torneyo. (BANAT NEWS)
- Latest
