Aces, Batang Pier semis sugdan na
CEBU, Philippines – Muhaw-as na gikan sa pahuway ang Alaska Aces sa ilang pakigharung sa GlobalPort Batang Pier sa Game-1 sa ilang ‘best-of-seven’ semifinals series sa PBA Philippine Cup karong gabii didto sa MOA Arena.
Interesante ang maong series tungod kay sangka kini tali sa usa ka karaang championship franchise nga Alaska ug tulo ka tuig pa lang nga PBA team nga mao ang GlobalPort.
Taas og pahuway ang Aces nga miangkon sa automatic semifinals berth isip No.1 seed human sa elimination, samtang ang Batang Pier miduwa pa sa quarterfinals lakip na ang kontrobersiyal nga kadaugan sa knockout game batok sa Barangay Ginebra San Miguel.
Ang Alaska desidido nga mudaog aron subling makuha ang laing finals berth, samtang ang GlobalPort mopahimus sa kahigayunan ilabi na nga kini ang unang higayun nga miabot sila sa Final Four.
Usa sa mga giatangan mao ang backcourt showdown tali nila ni Calvin Abueva sa Alaska ug Terrence Romeo sa GlobalPort kinsa suod nga higala dihang kuyog sila nga miduwa alang sa Gilas Pilipinas sa miaging FIBA Asia Championship. (BANAT NEWS)
- Latest
