Dili pa maoy katapusan

CEBU, Philippines – Ang giatngan nga comeback fight ni Manny Pacquiao batok ni WBO welterweight champion Tim Bradley karong Abril 9 didto sa MGM Grand sa Las Vegas dili pa maoy iyang katapusan.

Kana naggagikan mismo sa baba ni Pacquiao.

Sa wala pa mohingan ni Bradley isip maoy sunod niyang kontra, si Pacquiao namahayag nga lagmit kutob na lang siya sa usa ka away kay andam na siyang moretiro ilabi na kun modaog pagka- Senador sa Pilipinas sa eleksiyon karong Mayo. Apan dili na kini maoy dalan nga subayon sa Pinoy ring superstar sa umaabot.

Segun sa taho sa beteranong writer nga si Eddie Alinea nga gipatik sa Philboxing.com, si Pacquiao mipadayag nga dili niya dayonon ang iyang plano nga moretiro kun ugaling mahatagan og ‘rematch’ ni Floyd Mayweather Jr.

“I have been very vocal about it (fighting Mayweather) even before the Bradley fight was made official on New Year’s eve,” dason pa ni Pacquiao sa maong taho ni Alinea. 

“The reason is simple, I want to end my 21-year boxing career with a big bang so to speak.” 

“And what would be the biggest fight to end a career than fighting the best and finest boxer at least in this era?” pangutana pa sa kongresistang boksidor.

Sa susamang taho ni Alinea, gipasabot ni Pacquiao nganong si Bradley maoy iyang natipohan nga sangkaon sa iyang pagbalik og katkat sa ring, butang nga gisaway gikan sa mga fans kay klaro man kaayong dominante siya ug wa  kadaog ang iyang kontra sa nag-una nilang duha ka engkuwentro bisan tuod ang una kuwestiyonable kaayong gihatag ngadtong Bradley.

Alang ni Pacquiao, angayan lamang nga si Bradley maoy iyang harungon gumikan kay mao kini ang labing banggiitan nga welterweight karon. Gani iya pang gihatagan og gibug-aton ang pagpatikangkang ni Bradley sa ikasiyam nga hugna ni Brandon Rios, nga iyang gipilde pinaagi sa desisyon lamang duha ka tuig ang milabay didto sa Macau.

Taliwala sa nagbahang mga pagsaway, gipasalig ni Pacquiao sa iyang mga kritiko nga interes sa boksing ug sa mga fans maoy mipasulabi sa iyang galamhan sa pagpakanaog niya sa maong desisyon. (BANAT NEWS)