Grizzlies nakaipsot sa Heat
CEBU, Philippines – Nangayo pa og overtime ang Memphis Grizzlies una nila maangkon ang kutas nga kadaugan batok sa Miami Heat, 99-90 sa National Basketball Association kagahapon didto sa FedEx Forum sa Memphis, Tennessee.
Miiskor og 23 puntos si Marc Gasol lakip ang siyete puntos sa overtime period aron pangulohan ang Grizzlies. Si Zach Randolph midugang og 17 puntos, samtang sila si Mike Conley ug Jeff Green mitampo’g 16 puntos matag usa ug si Mario Chalmers adunay 12 puntos.
Gawas sa puntos, si Gasol mihimo’g walo ka rebounds, unom ka assists ug upat ka blocks.
Ang three-point play ni Gasol maoy naghatag sa Grizzlies og 96-88 nga bentaha sa nahabiling 1:22 sa duwa ug gikan didto wala na sila molugak hangtod sa katapusang gutlo sa duwa.
Si Chris Bosh maoy nangu sa Miami nga miburak og 22 puntos, gisundan ni Dwyane Wade sa iyang 19 puntos ug Goran Dragic nga adunay 16 puntos. Si Tyler Johnson miabuno’g 13 puntos alang sa Heat.
Ang Miami nakahimo pagtabla sa duwa dihang taud-taud una nilang gitugotan nga makaiskor ang Grizzlies human sa hook shot ni Randolph sa nahabiling 6:33 sa regulasyon.
May higayon pa untang modaog ang Miami, apan ang tirada ni Bosh igo lang miuntol sa ring atol sa paghuni sa buzzer hinungdan sa overtime.
Ang Grizzlies ug Heat nagtabla, 83-all paghuman sa regulasyon.
Sa laing duwa, ang New York Knicks midaog batok sa Detroit Pistons sa iskor nga 108-96.
Sila si Carmelo Anthony ug Derrick Williams maoy nangu sa opensa sa Knicks sa ilang 24 ug 18 puntos. Samtang si Ersan Ilyasova mao sab ang nangu sa Pistons nga adunay 19 puntos, gisundan nilang Marcus Morris ug Reggie Jackson nga parehong miabuno’g 17 puntos.
Midaog sab ang Atlanta Hawks dihang ilang gidagit ang Houston Rockets, 121-115 ug ang Oklahoma City Thunder mipakaging sa Milwaukee Bucks, 131-123. (BANAT NEWS)
- Latest
