Magbologtong, Beboso nanghawod sa Mano Amon Run

CEBU, Philippines – Sila si Jeboy Magbologtong ug Michelle Ann Beboso maoy nanguna sa listahan sa mga mananaog sa ika-37 nga edisyon sa Halad Kang Mano Amon Run niadtong bisperas sa Pasko didto sa dakbayan sa Danao.

Si Magbologtong maoy labing paspas sa men's 12K open nga iyang gitapos sud lamang sa 49 minutos ug 52 segundos. Iyang gilabwan ang beteranong si Robert Daang og siyete segundos, samtang si James Roy Roble maoy mitapos sa ikatulong dapit sa oras nga 51:14.

Sa women's division, si Beboso maoy mibira sa korona. Iyang gitapos ang lumba sud sa usa ka oras, unom ka minuto ug 51 segundos. Sila si Aurber Marlette Lusanta (1:14:23) ug Leste Alerta (1:18:35) maoy mipahiluna sa nagsunod nga duha ka dapit.

Sa all-Danao 6K run, si Harold Kim Guiao maoy naghari sud sa oras nga 22:13, samtang si Richtly Magbologtong (23:55) ug Jelly Genombraga (24:55) maoy nalandig sa ikaduha ug ikatulong puwesto.

Ang top 3 sa women's class mao sila si Margie Ceniza (21:48), Jovelyn Roca (33:30) ug April Joy Batoto (36:29).

Mingsalida sa 3K mao sila si Clientmark Antolijao (13:32) ug Jessa Mae Devido (17:20). (BANAT NEWS)