Hangtod sa katapusang ginhawa

CEBU, Philippines – Bisan sa katapusan niyang ginhawa, si Cebuano sportsman Felix Balbona mipakita sa iyang pagmahal sa matang sa paugnat sa kusog nga labing duol sa iyang dughan.

Si Balbona nabugtoan sa iyang kinabuhi samtang nagduwa og chess batok ni Jun Kidlat atol sa grand finals sa tinuig nga torneyo sa Cebu Executives and Professionals Chess Association (CEPCA) niadtong Domingo sa hapon didto sa Handuraw Pizza Cafe and Resto Bar sa Gorordo Avenue, dakbayan sa Sugbo.

Si Balbona ug ang iyang anak dalaga nga si Jessa apil sa mga qualifiers sa gibansagan nga ‘Battle of Champions’ ubos sa group B uban nilang Kidlat, Regelito Hortelano, Ruel Hortelano, Elmer Odango, Jerry Maratas, Felix Balbona, Mike Tinga, Jojo Paredes, Michael Ventulan, Edwin Cablao ug Romy Pialan.

Saysay pa ni Kidlat nga atol sa tunga-tungang bahin sa ilang duwa, nakamatikod siya nga dunay dili maayong hitabo human kalit lang nga mibunlot og ‘pawn’ si Balbona ug gibutang kini kilid sa iyang ‘rook’ nga alang kaniya di mao.

Sa dihang iyang nakita nga maora’g nikaging ug dunay dili maayo nga gipamati si Balbona, dali nga giundang ni Kidlat ang ilang duwa samtang siya misiyagit og ‘emergency’,  pagtawag sa atensiyon sa ilang mga kaubanan nga niadtong tungora seryoso kaayo sa tagsa-tagsa nila ka mga duwa.

Niadtong tungora ang asawa ni Balbona nga si Juliet ug ang uban miyembro sa iyang pamilya nga miuban niya dali nga mitabang kaniya ug dayon midala kaniya sa Perpetual Succour Hospital  apan  patay na nga nahidangat sa maong tambalanan.

Wala makasabot ang mga Cepcans sa ilang gibati kay nawad-an sila og usa ka haligi, higala ug suod nga kauban ug tigpaluyo sa grupo sa adlaw pa gyud diin sila nagsaulog og makasaysayanon nga kalihukan.

“I am deeply saddened by his sudden passing. He was a pure chess lover that even in his breath, he was playing the sport that he really love. But more than that, he was such a good and humble family man. He was a great loss to CEPCA. My thoughts and prayers are with him and his bereaved family,” matud pa ni CEPCA President Jerry B. Maratas.

Si Balbona simply nga tawo, apan mahug nga importanteng tawo sa Cebu chess kansang binuhatan angay sundon ug hinumduman. Anaa kanunay siya sa mga dagkung kalihukan sa chess dinhi ug ang iyang mga anak iyang gipadaku nga pulos mga chess lovers sama kaniya.

Nilampos siya nianang butanga ug ang paghulma og mga kampiyon sa iyang mga anak nga sila si Jessa, Felix Shaun, Marq Gabriel ug Jhon Francis maoy labing hayag nga legasiya nga iyang gibiyaan ning tawhanong kalibotan.

“He was just playing the game he cherished and loved most, when suddenly death appeared uninvited and in a most shocking fashion, struck with blinding swiftness. Just like a thief in the night, catching everyone unaware and unprepared,”  matud pa ni kanhi two-time CEPCA President Jun Olis. “We have lost one of the club’s pillar of strength – a kind, generous, unassuming and dedicated family man. You will always be remembered.” (BANAT NEWS)