Oliva pakyas pagsakmit og laing titulo

CEBU, Philippines – Pakyas ang Pinoy'ng boksidor nga si Jether 'The General" Oliva paglangkat og titulo human siya gipilde pinaagi sa unanimous decision ni kanhi IBF super flyweight champion Zolani Tete sa South Africa sa ilang 12 ka hugna nga engkuwentro alang sa WBO Africa super flyweight title niadtong Sabado didto sa East London, South Africa.

Gumikan niini, ang 27-anyos nga si Tete miinat sa iyang record ngadto sa 22-3, samtang si Oliva, ang kasamtangang WBF Asia Pacific flyweight champion nga lumad gikan sa dakbayan sa General Santos, nakatilaw sa ikaupat niining pilde nga giatbangan og 23 ka daog ug duha tabla.

Ang walhon  nga si Tete mipakamang sa ikawalong hugna ni Paul Butler sa katapusan niyang away niadtong Marso 6 didto sa Echo Arena sa Liverpool, Merseyside, United Kingdom.

Samtang si Oliva nahisukamod sa ikaduhang higayon sa iyang pagpangindahay didto sa Africa. Sa miaging tuig, gibuntog siya pinaagi sa split decision ni Moruti Mthalane sa ilang gubat alang  sa bakanting IBO flyweight title didto sa Durban International Convention Centre. (BANAT NEWS)