Misyon Nilang Ty, Balbona
CEBU, Philippines – Kasaysayan maoy tuyo nilang Jimmy Ty Jr. ug Jessa Balbona sa ilang pagkumbati sa grand finals sa tinuig nga torneyo sa Cebu Executives and Professionals Chess Association (CEPCA) sugod karong ala-1 sa hapon diha sa Handuraw Pizza Cafe and Resto Bar sa may dalan Gorordo dakbayan sa Sugbo.
Laraw ni Ty nga mahimo nga maoy labing unang maka-grandslam title, samtang si Balbona nagtinguha nga maoy labing unang babayeng kampiyon sa maong gitawag nga “Battle of Champions” sa CEPCA.
Mohagit ni Ty alang sa korona sa group A mao sila si Rey Flores, Arnold Cadiz, Tony Cabibil, Amado Olea Jr., Carlo Maraat, Stein Torres, Jojo Muralla, Peterson Sia, Rogelio Enriquez, Ross Yamyamin ug Martin Kwan. Samtang sa group B, si Balbona gipaabot nga mag-atubang og malisud nga hagit batok nilang Regelito Hortelano, Ruel Hortelano, Jun Kidlat, Elmer Odango, Jerry Maratas, Felix Balbona, Mike Tinga, Jojo Paredes, Michael Ventulan, Edwin Cablao ug Romy Pialan.
Ang makampiyon sa duha ka grupo modawat og P2,500, samtang ang mopahiluna sa ikaduha ug ikatulong dapit mobulsa og P1,500 ug P1,000.
May kompetisyon sab alang sa mga non-qualifiers diin ang top three modaog og P1,000, P700 ug P500.
Gawas sa katapusan nilang torneyo nga ipahigayon dungan sa ilang Christmas party ug paghurar sa bag-o nilang mga miyembro, lain pang angayan nga atngan sa mga Cepcans mao ang pormal nga paglusad sa ilang Silver Anniversary commemorative magazine.
Giulohan og “Silver Shining, CEPCA@25”, ang 28 ka pahina nga magasin nagladlad sa maanindot nga kaagi sa maong kahugpongan sukad kini mahimugso niadtong tuig 1990. (BANAT NEWS)
- Latest
