Megabond nakauna sa A+EBA finals

CEBU, Philippines – Miagi una og malisud nga dalan ang Megabond sa wala pa makaipsot batok sa Dorma, 53-52, sa kulbahinam nga Game-1 sa ilang ‘best-of-three’ championship series sa Architects+Engineers Basketball Association’s 1st Corporate Cup didto sa University of San Carlos-main gym.

Alkanse og singko puntos human sa unang kuwarter, 11-16, dali nga nakabawi ang Megabond aron pagtabla sa iskor  sa halftime, 24-all ug dayon nakasugakod sa mainit nga kumbati batok sa Dorma hangtod sa hinapos nga bahin sa duwa aron pagkulit og importanteng kadaugan.

Si Ed Macasling maoy nangu sa Megabond bitbit ang 23 puntos, upat ka rebounds ug tulo ka assists.

Si Loreneil Tequin mikimada og 20 puntos, siyam ka rebounds, upat ka steals, tulo ka assists ug duha ka blocks, apan nakawang ang iyang panglimbasog sa Dorma. Nanghinaut sila nga makabawos sa ilang pakigsangka og usab sa Megabond sa Game-2 karong adlawa.

Sa laing bahin, ang Fenestram awtomatik nga miangkon sa ikatulong dapit gumikan kay wala motunga ang CMI sa gikatakda nilang duwa.