Tapales mipakamang ni Omori sa WBO title eliminator

CEBU, Philippines - Si WBO No. 2 bantamweight contender Marlon Tapales sa Rex ‘Wakee’ Salud Stable mipatikangkang sa  top contender nga si Shohei Omori sa Japan sud lamang sa duha ka hugna sa ilang title eliminator niadtong Miyerkules sa gabii didto sa Shimazu Arena sa Kyoto, Japan.

Gumikan sa maong impresibong kadaugan, si Tapales nakaangkon og katungod nga maoy mohagit sunod ni WBO bantamweight champion Pungluang Sor Singyu sa Thailand.

Mangtas kaayo ang gipakitang abilidad sa 23-anyos nga si Tapales pagsugod  sa away gumikan kay gitumba niini ang kanhi wa’y pildeng si Omori tulo ka higayon sa unang hugna.

Sa ikaduhang hugna, si Tapales mipabuhagay og makalipong nga tuong suntok nga maoy nakapasukarap ni Omori sa ikaupat nga higayon nga   nakapaaghat ni reperi Lou Moret paghunong sa away.

Matud pa ni Wakee Salud, ang manedyer ni Tapales, nga sugdan dayon niya ang negosasyon aron mahan-ay na sa dili madugay ang world title fight tali sa iyang boksingero ug ni Pungluang.

Si Tapales, lumad gikan sa Tubod, Lanao del Norte, nagbitbit na karon og 28-2 win-loss record uban ang 11KOs, samtang si Omorio nakatilaw sa labing una niining pilde sa 16 ka away.  (BANAT PALARO)