Dagitab netfest mosikad karon

CEBU, Philippines - Mga tang-ang tennis players sa nasud magtakus sa ilang abilidad dinhi sa Sugbo pinaagi sa Palawan Pawnshop Open Tennis Championships-Dagitab Festival edition sugod karon didto sa Naga Tennis Club sa dakbayan sa Naga.

Si Patrick John Tierro, ang No.1 player karon sa Pilipinas ug ang nagsunod kaniya nga si Johnny Arcilla maoy nangu sa mga   lig-ong   title contenders sa torneyo.

Lain pang angayan tan-awon sa 32-man main draw mao sila si Onyok Anasta, Rolando Ruel, Leander Lazaro ug Ronard Joven.

Ang torneyo gibahin sa singles ug doubles event.

Sa laing bahin, sila si Tiffany Nocus ug Elizabeth Abarquez maoy nanghawod sa age-group tournament nga giorganisa sa Palawan Pawnshop nga kabahin gihapon sa Dagitab Festival sa Naga. Si Nocus maoy mibira sa titulo sa unisex 10-under ug girls 12-under, samtang si Abarquez milangkat sa korona sa girls 14 ug 16-under.  (BANAT PALARO)