J. Espina Agrivet abante sa finals sa Alchemae Friendship Cup

CEBU, Philippines - Si Jonher Espina mipabuto og 22 puntos nga gidayan-dayanan og unom ka 3-pointers dihang ang J. Espina Agrivet milubong  sa  Accra-Law, 86-57 aron moabante sa finals sa Alchemae League Friendship Cup 2015 niadtong Lunes didto sa Pope John Seminary gym sa Mabolo, dakbayan sa Sugbo.

Ang  J. Espina Agrivet ni team manager Jojie Espina  sayo kaayong milusad sa ilang opensiba diin mitanom sila og 24-6 nga bentaha paghuman sa first period.

Diskuntento sa ilang labaw, ang J. Espina Agrivet  padayon nga mipauwan og  mga puntos  hinungdan nga ilang gilumsan og  katunga ang Acrra-Law sa halftime sa iskor nga 45-22.

Ang 18-anyos nga si Espina gisuportahan sab ni Werdy Lopez, kinsa mikadlit og 14 puntos ug ni Baruk Ceniza nga miambit og 10 puntos.

Ang Accra-Law gipangulohan sab ni Niño Retuya sa iyang game-high 26 puntos, lakip ang upat ka triples, gisundan ni Jade Ursal nga mikorte og 16 puntos.

Maayo sab kaayo nga pagkadala ni coach Johnny Dieta ang J. Espina Agrivet kay bisan pa sa ilang makabungog nga labaw, wala gyud sila mokompiyansa ug gani iya pang gibingat ang labaw sa wala pa sila mokulit og 29 puntos nga demolisyon.

Hinuon, mihiyos sa makadiyot ang ilang labaw, apan dali sab kini nga miburot kay ang kanhi Cebu Institute Technology-University (CIT-U) Wildkittens miposa’g duha ka 3-pointers sa fourth quarter.

 Puntos Matag Usa

J. ESPINA AGRIVET (86) – Espina 22, Lopez 14, Ceniza 10, Cesa 9, Delgado 8, Tagalog 8, Miñoza 8, Pagasi-an 2.

ACCRA-LAW (57) – Retuya 26, Ursal 16, Cadungog 5, Lodo 5, Bastedio 2. (BANAT NEWS)