Black Tiger misikop sa korona

CEBU, Philippines – Nasakmit sa kapolisan sa Compostela ang ilang puntariya nga korona human ang Cops Black Tiger team maoy midaog sa Compostela Hardcourt Club (CHC) basketball tournament title pinaagi sa pagkulit og 81-74 nga kadaogan batok sa Gold Eagle sa knockout finals kagahapon didto sa Compostela gym.

Sa sayo pa, midaog ang Green Cobra ni CHC president Rey Gala batok sa White Stallions, 68-49 aron ma-angkon ang ikatulong pwesto. Si Glen Rosal kinsa maoy napiling MVP,  maoy nangu sa Black Tiger sa iyang 18 puntos samtang parehong may 12 puntos matag usa silang Jaime Marolina ug Jimmy dela Cerna.

Ang Gold Eagle gipangulohan ni Alvin Castro sa iyang 18 puntos ug midugang silang Archie Getalada ug Obet Velaso og 12 ug 11 puntos matag usa.

Naluya ug nahutdan sa hangin ang pak-an nga Gold Eagle tungod sa dinaganay ug mas kusog modagan ang Tiger.

Sa laing duwa, mibahug og 23 puntos si Jimboy Oposa alang sa Green Cobra kinsa mipaak sa White Stallions.

Midugang og 17 puntos si Boyet Villacarlos ug miamot si Rowen Velasco og 10 puntos.

Bugtong si Jimilo Banzon lang maoy nakahimo'g double figures alang sa White Stallions sa iyang 21 puntos hinungdan sa ilang low-scoring output.

Human sa championship game, gihimo dayon ang victory party ug ang Christmas party sa CHC nga gipasiugdahan ni Gala. Ila sang gilaraw ang sunod nga torneyo apan wala pa sila magkasinabot sa tukmang petsa.

Puntos matag usa:

Black Tigers (81) – Rosal 18, Marolina 12, Dela Cerna 12, Rondina 8, Respecio 8, Cacoy 6, Mejias 6, Goc-ong 6, Caturza 3, Rubilla 2.

Gold Eagle (74) – Castro 18, Getalada 12, Velasco 11, Rondina 8, Espante 6, Amor 6, Lucero 5, Rodriguez 2, Atok 4, Noval 2.

Second Game:

Green Cobra (68) – Oposa 23, Villacarlos 17, Velasco 10, Ramirez 8, Somblingo 8, Porlas 2.

White Stallios (49) – Banzon 21, Taneo 7, Apas 6, Calo 6, Oposa 5, Wagas 2, Abano 2. (BANAT NEWS)