USC ug UV sa PCCL

CEBU, Philippines – Sugdan karon sa University of San Carlos (USC) Warriors ug sa University of the Visayas (UV) Lancers ang ilang kampanya sa  Philippine Collegiate Champions League (PCCL) dihang ilang ikasangka ang mga

lig-on nga teams gikan sa Luzon ug Metro Manila qualifying games atol sa unang

adlaw sa PCCL Elite Eight didto sa Faith Gym sa Tanauan City, Batangas.

Ang Warriors kinsa maoy kampyon sa Cebu Schools Athletic Foundation, Inc. (CESAFI) kaniadtong Oktubre 20, makigsangka tali sa modaog sa National University Bulldogs ug sa Olivares College Sea Lions karong alas 4:00 sa hapon.

Ang Lancers sa laing bahin, makigsangka batok sa modaog tali sa Technological Institute of the Philippines (TIP) Engineers ug sa Lyceum Northwestern University (LNU) Dukes sa alas 2:00 sa hapon nga preliminary game.

Awtomatik nga miabante sa national finals ang Warriors tungod kay sila man maoy kampyon sa CESAFI samtang ang Lancers nakakuha'g luna alang sa Elite Eight knockout stage human ilang gipukan ang University of Negros Occidental-Recoletos (UNOR) Rams sa PCCL Vis-Min Zonal sa miaging semana didto sa  Ormoc City Superdome.

Ang Warriors ubos na karon ni coach Bong Abad, pagalangkuban sa mao gihapong mga players kinsa mibugto sa 57-year drought gawas lang kang Lucky Ecarma nga maoy mopuli sa lugar ni Ian Bensig kinsa dili makaduwa tungod sa piang.

Pinangulohan sa ilang alas nga Cameroonian import nga si Shooster Olago, ang Warriors makasalig sab kanilang Ian Tagapan, Charles Pepito, Ian Ortega, Nicot Magat ug Victor Rabat ingon kanilang Mave Suarez, Dolan Adlawan, Christian Maconocido, Gio Laguyo, Kevin Oleodo ug Kiefir Lim.

Tungod kay duha man ka imports ang gitugotan sa Manila league sama sa UAAP ug sa NCAA, idugang sa line-up sa Warriors ang  Congolese nga si Espoir Toyambi apan usa lang gihapon sa UV nga mao si Steve Cedrick Akomo.

Ang mga pambato sa Lancers ni coach Gary Cortes naglakip kanilang  Leonard Santillan, Franz Arong, Alfred Codilla, ug Jun Kent Manzo isip starting unit ug suportahan nilang Arvie Cabañero, Alwin Aguirre, Vincent Mendoza, Joshue Segumpan, Rey Suerte, Jayson Balabag, Michael Macion, Jerome Napao, Monic Soliva ug rookie Christian Bolaño.

Sa higayon nga modaog ang Lancers, ang sunod nilang ikasangka mao ang San Beda Red Lions samtang ang sunod ikasangka sa Warriors mao ang University of Sto. Tomas Growling Tigers.

Ang Lancers maoy bugtong Cebuano o provincial team nga maoy labing taas nga pwesto nga nakuha dihang sila maoy second placer sa Ateneo Blue Eagles niadtong 2007. (BANAT NEWS)