Romeo miluwas sa Batang Pier

CEBU, Philippines – Gipamatud-an ni Terrence Romeo nga siya ang umaabot nga superstar sa liga dihang gibaswat niya ang GlobalPort Batang Pier ngadto sa kulbahinam nga kadaugan pinaagi sa overtime,118-116 batok sa Mahindra Enforcers sa PBA Philippine Cup kagahapon didto sa Smart Araneta Coliseum.

Sa daginutong segundos sa overtime, si Romeo   mipasulod  sa iyang krusyal nga singko puntos nga mipadaog sa Batang Pier.

Si Romeo mipatusak sa iyang tres sa katapusang 39 segundos, aron matabla ang iskor sa overtime, 116-all, gisundan sa iyang steal nga miresulta og tsansa kaniya nga makapasud og lay-up atubangan sa depensa ni Jake Pascual.

Gisuwayan pa sa Enforcers nga matabla, apan  nasangit sila sa depensa sa Batang Pier hangtod nga mihuni ang katapusang buzzer sa duwa.

Sa maong kadaugan, ang Batang Pier misaka sa ikaupat nga dapit sa ilang 7-3 win-loss record, samtang mingitngit ang dalan sa Enforcers paingon sa playoffs dihang natagak sila sa 2-8 nga baraha. (BANAT NEWS)