Bulls giihaw sa Celtics

CEBU, Philippines - Midaog gyud ang Boston Celtics sa kulbahinam nga duwa batok sa Chicago Bulls, 105-100 sa nagkainit nga aksiyon sa National Basketball Association kagahapon didto sa TD Banknorth Garden sa Boston, Massachusetts.

Si Isaiah Thomas miiskor og nuybe sa iyang 20 puntos sa katapusang tres minuto aron pangulohan ang Celtics nga aduna na’y 3-2 sa ilang road trip nga naglakip sa ilang kadaugan didto sa Mexico City. Sa overall, ang Celtics nagbitbit na og 13-9 nga baraha.

Ang Boston mosuway sa pagputol sa nagkadinang 23 ka daog sa Golden State Warriors sa ilang duwa karong adlawa.

Si Kelly Olynyk midugang og 15 puntos, samtang silang  Evan Turner ug David Lee nga maoy nangulo sa 10-0 run sa Boston  miamot og 13 ug 12 puntos  matag usa.

Misikit ang Bulls sa katapusang tres minutos sa duwa diin biya lang sila’g tres puntos, apan  si Thomas miiskor og sagunsong singko puntos aron inaton ang labaw sa Celtics ngadto sa otso puntos. 

Ang 11-9 nga Bulls gipangulohan ni Jimmy Butler, kinsa mihimo’g career-high 36 puntos, samtang si Pau Gasol mihimo sa iyang ikalimang sunod-sunod nga double-double nga adunay 16 puntos ug 15 ka rebounds. Si Derrick Rose miabuno’g 12 puntos alang sa Bulls, kinsa napilde na og katulo ka sunod-sunod  nga higayon.  

Sa laing mga duwa, gipakaging sa Toronto Raptors ang San Antonio Spurs sa iskor nga 97-94  pinaagi sa 28 puntos ni DeMar DeRozan.

Ang Memphis Grizzlies nakaipsot batok sa  Detroit Pistons, 93-92, naka-eskapo sab ang Minnesota Timberwolves batok sa  Los Angeles Lakers, 123-122 pinaagi sa overtime, samtang   ang Phoenix Suns mipakaging sa Orlando Magic, 107-104

Midaog sab ang Charlotte Hornets dihang ilang gipukan ang Miami Heat, 99-81, ang Houston Rockets midaog batok sa Washington Wizards, 109-103, giihaw sa L.A. Clippers ang Milwaukee Bucks, 109-95,  ang Utah Jazz  mipukan sa New York Knicks , 106-85 ug   ang Atlanta Hawks midagit sa Dallas Mavericks, 98-95.  (BANAT PALARO)