Millennium mikaging sa sipat sa NABC Sinulog Cup
CEBU, Philippines – Gipakuratan sa 1988 Sipat ang mas batan-on nga Millennium 2000, 55-50 alang sa ilang 4-1 nga baraha uban sa biktima nila sa Division 2 sa University of San Carlos (USC) NABC Sinulog Cup niadtong Domingo didto sa USC North Campus gym sa Gen. Maxilom avenue, dakbayan sa Sugbo.
Sa laing aksiyon, midaog na unta ang 1984 Knights sa ilang duwa batok sa 1990 Titans, 64-62, apan tungod dark color uniform ang ilang sul-uton, ang light nagamit hinungdan nga gihatag ang daog ngadto sa naulahi.
Ang Titans aduna karo’y 5-2 nga baraha ubos sa Division 1, samtang ang Knights adunay 1-5 nga baraha ug nagtabla sa Bro ug Spartans.
Sa laing duwa sa Division 1, ang 1985 Legends miposte na og 6-0 nga baraha human midaog batok sa BAI ‘91 pinaagi sa forfeiture.
Sa laing bahin, midaog ang 2001 batok sa 1994 Bulldogs,75-67 ubos sa Division 2.
Si Charles Parrotina maoy nangu sa Dos Mil Uno sa iyang 26 puntos, samtang si Sigmund Cabrera adunay 16 puntos alang sa Bulldogs.
Ang 1999ers sa laing bahin, mipilde sa 1996 Chubbies, 70-62 aron temporaryong mag-una sa Division 2 sa ilang 5-1 nga baraha.
Midaog sab ang 2010 Pioneers batok sa 2004 Rebels, 71-64, ang 1988 Barakos midaog batok sa 1986 Mighty Geeks. Ang 1987 Bro mipukan sa 1989 Spartans, 68-54 ug ang 1993 Dragons midaog batok sa Little Rascals, 56-51 aron magsolo sa ikaduhang puwesto sa ilang 5-0 nga baraha. (BANAT NEWS)
- Latest
