Iesieken vs Allied sa Triple-A finals

CEBU, Philippines – Sama sa usa ka masilakong bitoon, mihayag sab ang paglaum sa Iesieken nga mokulit og makasaysayanong ‘grandslam’ liga sa Triple-A (Allied Athletic Association).

Kini human sila  miabante sa finals pinaagi paglubong sa Limasawa sa semifinals sa Triple-A Christmas League 2015,  73-49 niadtong Domingo didto sa Kimwa gym sa Barangay Subangdaku,  dakbayan sa Mandaue.

Gipangulohan gihapon ni Mai Suson ang kadaugan nga mikamada og 13 puntos. Misalida sab og maayo si Orly Navarro aron  motampo’g 12 puntos alang sa Iesieken nga miangkon  sa ilang  sayong kadaugan  human sila milabaw og kapin katunga, 43-18  sa nahabiling 3:48 sa third quarter.

Ang Limasawa nga gibarahan dayon  sa pagsugod gipangulohan ni Adrian Gogo, kinsa mikulit og 12 puntos, gisundan ni Anton Ontong nga adunay 11 puntos. Ang playing coach nga si Redyn Villaronza mitikdol og 10 puntos, apan  usa sa ilang sinaligan nga si Francis Palero, kinsa adunay gihambin nga injury   wala makatiwas og duwa  ug igo lang miiskor og singko puntos.

Sa maong kadaugan, ang Iesieken manalipod sa ilang titulo batok sa Allied team, kinsa miabante sab sa finals human nila gilubong ang undermanned nga Gilas D’ Boys ni team owner Jason Pestaño, 80-58.

Sukwahi sa Iesieken, ang Allied maoy naggukod gikan sa pagsugod ug nabiyaan  sa halftime, 25-39.

Nausab ang dagan sa duwa dihang naluya na ang Gilas sa third period hinungdan nga hinay ang pag-irog sa ilang iskor hangtod nga nakawat sa Allied ang labaw, 55-51 sa sayong bahin sa fourth ug sukad niadto wala na sila makarekober.

Tulo ka players sa Allied ang miiskor og double figures sa pagpangulo ni Barak Rector sa iyang 11 puntos. Sila si Erwin Budiongan ug Richard Madrid parehong mikadlit og 10 puntos.

Ang natagak nga Gilas gipangulohan ni Rex Gonzaga nga miburak og 25 puntos, gisundan ni Rechel Bamba nga adunay 11 puntos.

Ang Iesieken-Allied titular showdown himuon karong Domingo human sa duwa tali sa Limasawa ug Gilas nga mag-ilog alang sa ikatulong dapit.

Ang torneyo nga nahimo pinaagi sa paningkamot ni Triple-A presidente Gilbert Lesin, gipadagan nilang league commissioners Jun Arceo ug Cris ‘Crismart’ Martinito, inabagan nilang Chang Tejero, Kenneth Ypanto, Arman Gonzaga, Boboy Zanoria ug Chigie Gesulga.

Puntos Matag Usa

Unang duwa:

IESIEKEN (73) – Suson 13, Navarro 12, Abong 6, Arche 6, Cuerbo 6, Gokotano 6, Macalam 5, Tagalog 5, Lumen 4, Grafe 4, Almario 2, Majam 2, Montalban 2.

LIMASAWA (49) – Gogo 12, Ontong 11, Villaronza 10, Palero 5, Sabang 5, Cabahug 4, Cardoza 2, Armamento 2.

Ikaduhang duwa:

ALLIED (80) – Recto 11, Budiongan 10, Madrid 10, Ygoña 8, Mendoa 7, Lesin 6, Cabahug 6, Secad 4, Catinoy 4, Luga 4, Martinito 4, Ocier 2, Retiza 2, Yatan 2.

GILAS (58) – R. Gonzaga 25, Bamba 11, Dakay 9, A. Gonzaga 8, Englis 3, Manatad 2. (BANAT NEWS)